2016ko urtarrilaren 19a

Normalean asteazkenetan izaten  dugu bilera, baita  saioa ere, baina aste honetan lanagatik ezin dute eta gaur egin dugu.

BILERA_SAIOAN EGINDAKOA

• Bileran Zerbitzuko buruak idatzitako urteko plana azaldu eta irakurri ahala, idazkia zuzendu eta egokitu dugu.
• Gaur  aipatutakoak eta abenduko mezu eta dokumentuetako akatsak zuzendu edo egokitu.

Jakinarazten dizuet honako termino hauek erantsiko ditudala blogeko hiztegian:

Epemuga: día de vencimiento

Epea: plazo

ZORIONAK  KONTROL ATALEKO LANGILE GUZTIOI URTEKO  PLANA EUSKARAZ EGIN DUZUELAKO!!!!

SEGI HORRELA!!!

BILBOKO IV. BERBAGUNEA

BILBOKO IV. BERBAGUNEA: URTARRILAREN 21EAN 

Euskararen erabilera sustatzeko helburuarekin, Bilboko Udalaren Euskara eta Hezkuntza Arloak eta Bizkaiko Foru Aldundiaren Euskara Zuzendaritza Nagusiak bultzatuta, “BILBOKO IV. BERBAGUNEA” antolatuko da 2016ko urtarrilaren 21ean, BILBOKO AZKUNA ZENTROAn, ALONDEGIAn. 

Ekimen honen erronka euskararen erabilera kalera ateratzea izango da euskaldunak eta euskara ikasten ari direnak elkarrekin euskaraz berbetan jartzea. Euskara euskaraz konpartitzea da asmoa. 

NORK HAR DEZAKE PARTE 

Euskaraz ulertzeko gaitasuna duen edonork (nahitaezko baldintza, euskarazko solasaldia oztopatuko ez duena, hain zuzen ere). Euskaldunak eta euskaldun hartzaileak batu nahi ditugu.

FUNTZIONAMENDUA 

Egunean zehar lau txanda antolatuko dira, eta guztira mila pertsonatik gora hartuko du parte. Hiru txanda goizez eta bat, laugarrena, arratsaldez:
 09:30 – 11:00 Lehen txanda.
 11:00 – 12:30 Bigarren txanda.
  12:30 – 14:00 Hirugarren txanda.
  16:30 - 18:00 Laugarren txanda arratsaldean.

 Mahaikide bakoitzak hiruorriko bat izango du landu behar diren hiru gaiekin. Mahai bakoitzak moderatzailea izango du. Moderatzailea euskaldun osoa izango da eta bere eginkizuna elkarrizketa sustatzea izango da sei mahaikideen artean.

Gonbidatuko ditugu gizartean nolabaiteko oihartzuna duten pertsonak: kultur arlokoak, kirol arlokoak, alderdi politikoetako ordezkariak eta beste sektore batzuetakoak, ekimenean parte har dezaten eta kaleko jendearekin mahai baten inguruan hitz egiteko elkartu daitezen.

 Bene-benetan eskertuko genuke zuen parte-hartzea; izan ere, oso modu positiboan baloratzen dugu BERBAGUNE bezalako ekimenen bidez euskararen erabilera sustatzeko eta babesteko egiten duzuen ahalegina.

Ekitaldian parte hartzeko, adierazi mesedez zenbat lagun etorriko zareten eta zein txandatara, jende kopurua ondo kalkulatu ahal izateko.
Bereziki 3. txandan (12:30 – 14:00) eta arratsaldeko 4. txandan (16.30 – 18:00) egotera gonbidatzen zaituztegu, lehenengo bi txandak, bereziki, ikastetxe eta eskolako ikasleei zuzenduta baitaude.

Aurreko edizioetan legez, IV. Berbaguneak ere parte-hartze arrakastatsua izatea espero dugu.

Aldez aurretik eskerrik asko zuen interesagatik,
Azkuna Zentroan elkartuko garelakoan,
Agur bero bat,
Aitziber Olabarrieta
Berbagunearen koordinatzailea

berbagunea@gmail.com 

944 162 472 / 619 400 892

Argazkia: www.bizkaia.net

2016ko urtarrilaren 13ko saioa

Bileran aipatu eta idatzitakoak zuzendu ez ezik,  langileek  zehaztutako Kontrol Ataleko urteko helburuak  idatzi eta komentatu ere egin genituen. Bukatzeko, Zerbitzuko buruak euskaraz idatzitako urteko planaren eskema irakurri eta  egokitu genuen.

Oso ondo ari zarete, segi horrela!!!!

HIZTEGIAN ERANTSITAKO HITZAK:

Auxiliar educativo= hezkuntza-laguntzaile

Contrato de alojamiento= bizitoki-kontratu

Diligencias previas nº000/15= 000/15 aurretiazko eginbideak

Fiscalía Provincial de Bizkaia= Bizkaiko Fiskaltza Probintzial

Foso= hobi(Eraikuntza); pezoi(Artea)

Juzgado de Instrucción nº1= 1. zenbakiko Instrukzioko Epaitegi/ Instrukzio-epaitegi

Bigarren bizia emateko asmoz

Bigarren bizia emateko asmoz

Bigarren eskuko liburuak saltzeaz gain, Bilboko Libu liburu dendak gizartean baztertuta dauden pertsonak gizarteratzeko lan egiten du. Lehen liburu denda soziala da.

                  

              

 Argazkia: MARISOL RAMIREZ / ARGAZKI PRESS

2016-01-09 / Lander Muñagorri Garmendia

Libu liburu denda jartzen du Bilboko Harategizar kalearen 7. zenbakian dagoen lokaleko kristalean. Denda berria da; horren berria, oraindik ate gainean Corvedi Serantes aurreko dendaren izena jartzen baitu harrian zizelkatuta. Hilabete ere ez darama izen berriko dendak Bilboko Zazpikaleetan; erronka berri bat, Borja Agirre bertako kidearen arabera. «Urtero bi liburu denda ixten dira, eta gu joera hori apurtzera etorri gara». Ez dute, ordea, edonolako liburu denda jarri martxan. Bigarren eskuko liburuak saltzen dituztelako batetik, eta denda soziala ere badelako bestetik. Dendaren kristalean liburu denda jartzen du, baina hori baino askoz gehiago ere bada atez barruko lokala.

Hain zuzen Zubietxe elkartea dago liburu dendaren atzean. Gizartean baztertuta dauden pertsonekin egiten dute lan elkarte horretan. «Txirotasun handia dago Bizkaian, eta muturreko pobrezia txikiagoa» den arren, horiekin egiten dute lan. Egoera horren ondorioz arazo psikologiko, ekonomiko eta sozialak dauzkaten pertsonak berriz gizarteratzeko egiten dute behar. Eta horiez gain, halako arazo larririk ez duten etorkinekin ere bai. «Askok, esaterako, ez daukate arazo psikologikorik baina integratzeko zailtasunak dauzkate, eta horretan laguntzen ditugu». Agirre azalpenak ematen ari dela, bi etorkin sartu dira Libu liburu dendan. «Lagun bat aurkeztera nator», azaldu dio horietako batek. Minutu gutxi barru, berriz ere kanpora bidean dira biak.

Hain zuzen, horretarako ere bada liburu denda, «Zubietxe elkarteak egiten duen lanaren erakusleiho izateko». Izan ere, orain arte eurena bezalako elkarteek ateak itxita lan egin dutela azaldu du Agirrek. Hau da, «lan profesional handia egin dugu, baina prozesua amaitzen zenean, jendearen integrazioa zaila izaten zen». Eta ez hori bakarrik, gizartean ere jende askok ez daki zer egiten duten halako elkarteek pertsona horien integrazioa lortzeko. Horregatik pentsatu dute Zubietxe elkartetik gizarteari ateak zabaldu, eta euren lana ezagutzea emateaz gain, integrazioan ere pausoak ematea. Alegia, gizarteratzeko zailtasunak izan ditzaketen pertsonak eta herritarrak harremanetan jartzea.

Apur bat geroago beste etorkin bat sartu da liburu dendara, eta Serge Yiepmou ozenki agurtu du. Elkarteko beste kideei ere kasu egin die ondoren, eta berriz kalera irten da. Agirre hitz egiten ari den bitartean dendako zorua garbitzen ari da Yiepmou, 2009an elkartean sartu zen kamerundarra. «Nire bizimodua bilatzeko asmoz inguratu nintzen elkartera, eta ahalegin handia egin dute nire egoera bideratzeko». Sei urte daramatza elkartean, eta noizbehinkako lanekin borondatezko lana partekatzen du. «Eurek niregatik horrenbeste egin ondoren, nola ez nuen nik beste hainbeste egingo?», dio. Egunero igarotzen da liburu dendatik, egin beharrekoetan laguntzeko.

Bigarren eskuko liburuak

Liburu dendan sartu bezain pronto, zahar kutsua sumatzen da. Altzari vintage-ekin txukun antolatuta dago denda guztia, «orain modan dagoen bezala», Agirreren arabera. Apalategi birziklatuetan gaika eta generoaren arabera sailkatuta daude birziklatutako liburuak. Hori ere badelako dendaren beste helburuetako bat: liburuak birziklatzea, eta etxeetan hautsa biltzen ari diren liburu horiei erabilera ematea. Donazio bidez jasotzen dituzte liburu horiek, eta hiru euroren truke saldu. «Elkarteari eta behar gehien duten pertsonei diru laguntzak jaitsi egin zaizkie, eta hori ere bada helburuetako bat, diru hori behar den lekura bideratzea». Hala ere, irabazteko tartea txikia dela aitortu du, «liburu dendaren alokairua eta soldatak ere ordaindu behar direlako». Edozein modutan, oraingoz zenbakiak ongi atera zaizkie.

Hilabete besterik ez daramate martxan, baina denbora tarte horretan lortu duten harrerarekin gustura azaldu dira Libuko kideak. Gabonetarako zabaldu zituzten ateak, eta gutxienez otsailera arte egongo dira han. «Orduan ikusiko dugu ea proiektua bideragarria den ala ez; liburu dendak erakusleihoa izan nahi duen arren, ezin dugulako galerak eduki».

Otsail amaieran ikusiko dute proiektuak aurrera jarraituko duen ala ez, baina oraingoz itxaropentsu hitz egiten dute Arregik eta Myrsini Iliopoulou dendako beste kideak. «Jende asko etorri da erostera, eta horrez gain, jende asko etorri zaigu euren liburuak bertan uztera», azaldu dute. Hainbeste, atzo goizean bertan sobera zituzten liburuak furgonetaz eraman behar izan zituzten Zubietxeren egoitzara. «Negozioak ondo funtzionatzen badu, etorkizunean liburuak Internet bidez ere saldu nahiko genituzke», dio Agirrek. Urrun ikusten du aukera hori, baina itxaropentsu diren seinale ere bada. Oraingoz, liburuak Harategizar kalean salduko dituzte, eta horrez gain, hitzaldiak eskaintzen ere hasiko dira. Lehenengoa Josune Muñoz Skolastikako kideak emango du, asteartean, 19:00etan.

http://www.berria.eus/paperekoa/1845/040/001/2016-01-09/bigarren_bizia_emateko_asmoz.htm