UDAKO OPORRAK

Uda heldu da eta horrekin agur esateko garaia!

Oso gustura ibili naiz zuen artean, baina ostegunetik aurrera oporretan izango naiz!!!

Gaizki esanak barkatu, eta ondo esanak gogoan hartu eta…

 Ondo pasa uda!!!

 UDARAKO EUROSKOPOA

ARIES Zeharo makalduta utzi zaitu pandemia garai honek, eta beharrezkoa duzu bizitza soziala berreskuratzea. Aholkua: Mesedez, kalera atera eta ez pasa beste arratsalde bat labeari begira bizkotxoa noiz igoko den zain! TAURUS Udaberriko loreak bezala, bizipoza gainezka izango duzu uda honetan, eta horrek erakargarri egingo zaitu. Aholkua: Argi ibili, erla-mando ugari izango dituzu eta inguruan! GEMINI Zure bizitzako etapa berri bat hasiko da udarekin. Garai ezin aproposagoa izango da abentura berriei ekiteko. Aholkua: surfa egiten ikasi, baratzean hasi, magia ikastaro batean izena eman, zikiroa kozinatu... milaka aukera dituzu aurrean! CANCER Urte bat gehiago egingo duzu eta denbora gero eta azkarrago pasatzen dela iruditzen zaizu. Bizipoza berreskuratzeko garaia da. Aholkua: Zergatik ez duzu frontoian urtebetetze festa erraldoia antolatzen? LEO Udako giroak odola aztoratzen dizu, eta uda honetan norbait interesgarria ezagutzeko aukera izango duzula diote izarrek. Aholkua: Etxetik ateratzerakoan ez ahaztu desodorantea ematea! VIRGO Iritsi da hainbeste itxaroten ari zinen aukera. Zure bizitza ez da berdina izango hemendik aurrera. Aholkua: Artisten gaueko izarra izango zara, bai horixe! LIBRA Zaintza erdigunean jarri behar dugula esaten zabiltza behin eta berriz, baina zure burua ez duzu asko mimatzen. Aholkua: Itzali mugikorra eta egin aspaldian egin nahi duzun hori. Bai, horixe bera. SCORPIUS Hasi da hondartza denboraldia eta irrikan zaude itsaso-ingurura joateko. Aholkua: Erredurak, olatu arteko zilipurdiak eta hondarra gorputzeko zirrikitu guztietan: paradisua izango da! SAGITARIUS Besarkada eta muxuen yonkia bihurtu zara azken urte honetan. Aholkua: Ezin dituzunez pertsona guztiak musukatu, gainean eraman emergentziazko pelutxe bat. CAPRICORNIUS Oso estresatuta zabiltza eta erritmoa jaistea beharrezkoa duzu. Deskantsua oso garrantzitsua izango da uda honetan. Aholkua: Siesta da zure aberria. AQUARIUS Garbitasunarena gaixotasuna ari da bihurtzen zuretzat, eta neurriak hartu behar dituzu. Aholkua: Egun batean gel hidroalkoholikoa lubrikantearekin nahastuko duzu eta orduantxe komeriak! PISCIS Etxetik laneran eta lanetik etxera, hori da zure errutina. Dagoeneko aurpegia ere zimelduta daukazu! Bidaia-sorpresa bat egitea ez litzaizuke gaizki etorriko. Aholkua: Benidorm oso polita egoten da garai honetan.

 

 

 

ARTIKULUA: SUA

Sua

Gaur gauean suak hartuko du Euskal Herria. Bakoitzak bere erara egingo du han edo hemen ikasitako errituala: paperean idatzitako esperantzak eta beldurrak erre, nahi ez ditugun gauzak sutara bota, suari zerbait eskatu... Barruan bila hasita, denok daukagu suak erre dezan nahiko genukeen zerbait. Zer pentsatua ematen dit hamarkada gutxian Euskal Herriak izandako aldaketak: udako solstizioan soroak garbitzeko sua egitetik, geure burua garbitzeko egitera pasatu gara. Aukera biak zaizkit interesgarri, baina pena ematen dit suaren inguruan ez kantatzeak. «Gure soloan zaporik ez, sugerik ez...», kantatzen dugu guk etxean, baina honezkero, ia inor ez du kezkatzen soroetan sugeak egoteak.

Historiaren zikloa baino ez da izango, baina irudipena daukat egiten dugun ia guztia hiritik eta hirirako egiten dugula. Baserriari eta bide batez lurrari lotutako hiztegi osoa ari da galtzen, bere erritual eta kantu eta guzti. Denak ez digu balioko etorkizunean, baina akaso, zeozerk bai. «Gure soloan saporik ez, sugerik ez… badagoz be, erre beitez», kantatzeak ez du zentzurik izango, baina bizitzari eskatzen diodana paper batean idatzi eta sutara botatzeak ere ez. Nik gauza biak egingo ditut. Ez baitaude kontrajarrita norbera eta kolektiboa, norbera eta norbera inguratzen duen lurra.

Onintza Enbeita

 Berria, 2021eko ekainak 23