Hau, hori, hura: erakusleak, ideiak lotzeko lagun
- Kontzeptuak behin eta berriro ez errepikatzeko
- Esaldi luzeegiak zatitu eta ulergarritasuna irabazteko
- Lehenago esandako kontuei erreferentzia egiteko edo ondoren datozenak aurkezteko
Kasu horietarako guztietarako oso baliagarriak dira erakusleak. Baina noiz ibili zein?
Gertutasunaren arabera, hiru gradutan bereizten dira
erakusleak:
Singularra
|
Plurala
|
|
1.gradua
|
Hau, honek, honi, honen
|
Hauek, hauek, hauei, hauen
|
2.gradua
|
Hori, horrek, horri, horren
|
Horiek, horiek, horiei, horien
|
3.gradua
|
Hura, hark, hari, haren
|
Haiek, haiek, haiei, haien
|
Graduaren arabera, honako funtzioak bereiz ditzakegu:
1. graduko erakusleak:
(HAU, HONEK, HONETAN…)
a) Ondotik datorren informazioari erreferentzia egiteko. Adib.:
- Baimena lortzeko honako baldintza hauek bete behar dira: Durangoko elkarte bateko kide izatea, 18 urtetik gora edukitzea…
- Dokumentu hauek aurkeztu beharko dituzte HAZen: NANaren fotokopia, eskabide-orria…
b) Testuaren gai orokorrari erreferentzia egitea. Adib.:
- (Ordenantza baten barruan) Ordenantza honen xedea hiri-bideen erabilera arautzea da.
- (Testu osoan Durango Alokairua programari buruz gabiltzanean) Programa honetan etxea alokatu gura duten herritarrek eta etxeen jabeek parte har dezakete.
2. graduko erakusleak: (HORI, HORREK, HORRETAN…)
Arinago idatzi ditugun idatzitako kontzeptuei erreferentzia egiteko. Adib.:
- Berdintasun Planaren diseinua egiteko parte-hartzean oinarritutako prozesu bat landu dugu eta prozesu horretan egindako lanarekin txostena osatu dugu.
- Ordaindu beharreko zenbatekoa dagokion Ordenantza Fiskalean jasoko da. Ordainketa hori gauzatzeak ez du esan nahi ibilgailuak gune berean aparkaturik segi dezakeenik, aitzitik, berehala kendu beharko da handik.
3. graduko erakusleak: (HURA, HAIEK, HAREN…)
Testuan lehenago esandako kontzeptua urrun gelditu zaigunean. Adib.:
- Jaiak prestatzeko lehen batzarra martxoaren 2an izan zen. Batzar hartan, iazko San Faustoen balorazioa irakurri eta lehen proposamenez berba egiten hasi ginen.
- Azterketariak esandako baldintzak betetzen ez baditu, epaimahaiak baztertutakoen zerrendan sartuko du hura.
