KONFINAMENDUA ARINTZEKO 2 FASEA II

EUSKARAZ EZ DA EGOKIA (XXVI)

EZER/ZERBAIT, INOR/NORBAIT, INOIZ/NOIZBAIT

Ezer, inor, inoiz eta kidekoak ezezko perpausetan erabiltzen dira gehienetan, baina ez ukatzailea behar dute zentzu negatiboa izateko. Ere aukerakoa da.

—Zer esan dizu? —*Ezer / —Ezer (ere) ez (bizkaieraz: ezebez)

—Nor etorri da? —*Inor / —Inor (ere) ez. (bizkaieraz: inorbez) 

Galderetan, bada ñabardura bat ezer eta zerbaiten artean (eta berdin inor eta norbaiten artean, eta abar): ezer eta inor baino modu espezifikoagoan, zehatzagoan ulertzen dira zerbait eta norbait:

Norbait etorri al da (etortzekoak zirenetatik)?

Inor etorri al da? (‘Pertsonarik etorri al da?’).

Baieztapen-perpaus batzuetan ere erabiltzen dira ezer, inor, inoiz eta kidekoak; batez ere, baldintzazkoetan:

Ezer gustukorik aurkituz gero, erosi egingo dut.

Inor bada ekonomian aditua, bera da.

Inoiz ikusi izan ditut horrelako perretxikoak.

Inon egotekotan, frontoian egongo da.

Erabilera berezi bat ere badu inor izenordainak: «inoren» esanda, ‘besteren’, ‘norberarena ez den’.

Ezetz erantzun nion, narrasegi nengoela inoren etxean bisitari agertzeko.

Norbait, zerbait eta kideko izenordainen esanahi berekoak ditugu hauek: nor edo nor, zer edo zer / zeozer eta abar.

JAKINGARRIAK

Nola esaten da euskaraz 'más lento que el caballo del malo'?

 

Hona hemen hori adierazteko zenbait esamolde:

Barea baino motelagoa

Bare zaharra baino motelagoa

Dortoka baino makalagoa

Jotako astoa baino makalago

Astarrak umea egingo dik/din hi mugitu orduko

Geldoa baino geldoagoa

Makala baino makalagoa

Motela baino motelagoa

Oiloak pixa egingo dik/din hi mugitzerako

Zu mugitzerako Facebookek ere tuitak egingo ditu

 

PILULA GUZTIAK IKUSTEKO klikatu hemen